«Os meus primeiros recordos da infancia viaxan ata Présaras, unha pequena aldea da Coruña, onde medrei sentíndome parte dunha comunidade na que era habitual saír da casa e deixar a porta aberta todo o día, coa tranquilidade de quen confía nos que o rodean.

Unha desas memorias que perduran ata hoxe, e que me motivan para seguir creando, foi o día que coñecín a literatura infantil na marabillosa biblioteca da miña escola primaria.

A arte acompañoume de múltiples formas desde que teño uso de razón, o que me levou a anunciar rotundamente aos cinco anos que quería estudar o mesmo ca o presentador de Art Attack.

E así foi como no 2013 comecei a miña carreira de Belas Artes en Pontevedra, cidade que me acolleu ata o 2025.

Na actualidade, rexento o meu propio estudo artístico no bucólico pobo mariñeiro de Bueu.

Pero foi a raíz de estudar un Máster en Educación cando retomei a curiosidade polo álbum ilustrado coa intención de crear algo que falase de min, de conservar os meus recordos de nena e traer ao presente a miña realidade de entón.

Así comecei a escribir e ilustrar, poñendo a alma en cada pincelada para compartilo con vós. Conseguir transmitilo é o meu maior desexo.»